2 Raja-raja 11
Iatonna tiromi Atalya, indo’na Ahazia kumua iatu anakna matemo, ta’kala malemi umpatei nasangi tu bati’na datu.
Apa iatu Yoseba, anakna baine datu Yoram, anak daranna Ahazia, male unnalai tu Yoas, anakna muane Ahazia, nabaa bunii sola to mantaranakna dio mai mintu’ anakna muane datu tu dipongko, anna patamai bilik dinii manganna inan kamammaran. Nabunian Atalya, naurungan tae’ nadipatei.
Torromi sola annan taunna membuni lan banuanNa PUANG, tonna Atalya ma’parenta lan tondok.
Iatonna taun ma’pempitu mesuami tu Yoyada untambai mintu’ pangulunna ke saratu’oi surodadu pa’tonno’ sia to ma’kampa, nasolanni tama banuanNa PUANG, sia sibasse tu tau iato mai sia nasua umpalao sumpa lan banuanNa PUANG. Mangkato napatiroammi tu anakna muane datu lako tau iato mai.
Napasanmi lako tu tau iato mai, nakua: Susite tu apa la mipogau’: Sangtaangkomi tama ke allo katorroan la ungkampai tongkonan layukna datu,
sangtaan dio to’ babangan Sur sia sangtaan dio to’ babangan boko’na to ma’kampa, iamoto tu sipatu la sisonda-sonda ungkampai banua kabusungan.
Duang torroangkomi, tu tae’ natama ke allo katorroan, sipatukomi la ma’kampa dio banuanNa PUANG, sikandappi’ tu nanii datu.
La mitalimbung tama tu datu, pantankomi sitangke pa’buno, na minda-minda urruang tangngai tu surodadu ma’tibang la dipongko. La mirondong tu datu, ke tassu’i ba’tu iake tamai.
Iatu mintu’ pangulunna sisaratu’ surodadu napogau’mo tu mintu’ apa napepasanan to minaa Yoyada; pantan unnalami taunna tu mentoe ke allo katorroan sola tu tau tang mentoe, anna pada sae tu tau iato mai lako to minaa Yoyada.
Napa’benganmi to minaa Yoyada lako kamandangna saratu’ surodadu tu mai doke sia balulang tu lu dio mai datu Daud, tu lan banuanna PUANG.
Bendanmi tu mintu’ to ma’kampa pantan sitangke pa’buno randuk dio mai rampe kananna sae lako rampe kairinna banua, sikandappi’ inan pemalaran sia banua, untikui datu.
Nasolammi lako salian tu anakna muane datu, napasongko’i makota, sia naben Kasa’bian. Susimoto tu tau iato mai unnangka’ datu; natokko, anna massala’pa-la’pa tu tau iato mai sia metamba-tamba nakua: Na maupa’mora tu datu!
Iatonna rangii Atalya tu gamaranna mintu’ to ma’kampa sia to buda, malemi tama banuanNa PUANG lako to’ to buda.
Natiromi tu datu bendanmo dio to’ lentong situru’ lalan ada’ sia mintu’ kamandang sitangke tarompe’ ma’dioren sola datu; sia mintu’ to buda lan lu tondok iato siparannu-rannuan na umpannoni tarompe’. Nase’buse’bumi Atalya tu tamangkalena sia metamba nakua: Denmo, pa’tangnga’ leko’, pa’tangnga’ leko’!
Nasuami to minaa Yoyada tu mai kamandang ungkapalai saratu’ surodadu, iamotu mai pangulu surodadu, nakua: Solanni tassu’ lan tangnga-tangngana surodadu ma’tibang sia minda-minda tu unturu’i patei pa’dang. Belanna napokadamo to minaa, kumua: Podo da nadipatei lan banuanNa PUANG.
Natingkanmi tau iato mai, nasolanni tama ba’ba lalan darang tarru’ lako tongkonan layuk, nadio dinii umpatei.
Natananmi Yoyada tu basse lan alla’Na PUANGna datu sia to buda, kumua na iatu to buda dadi misa’ taunNa PUANG sia lan duka alla’na datu na to buda.
Iatu mintu’ pa’tondokan male lako banua dinii umpenombai Baal anna rondonni; sia natesse tu mai inan pemalaranna sola rapang-rapang dipodeatanna sia napatei duka tu Matan, to minaanna Baal, dio tingayo inan pemalaran. Nasuami to minaa tu tau ungkampai banuanNa PUANG.
Nasolammi tu mai kamandang ungkapalai saratu’ surodadu, sia iatu surodadu pa’tonno’ sia to ma’kampa, sia mintu’ pa’tondokan; nasolanni tassu’ tu datu lan mai banuanNa PUANG: malemi tu tau iato mai unnola babangan to ma’kampa tama tongkonan layuk kadatuan, anna iatu datu unnisungmo dao isungan kapayungan.
Iatu mintu’ pa’tondokan parannu-rannu sia iatu kota marampa’, tonna mangkamo dipatei pa’dang tu Atalya lan tongkonan layuk.
Iatu Yoas pitung taunmo tonna dadi datu.